Ошто жаңы мектеп пайдаланууга берилди

Ош шаарында билим берүү тармагындагы дагы бир маанилүү долбоор ишке ашып, жаңы 148 орундуу мектеп пайдаланууга берилди. Ачылыш аземине шаар жетекчилиги, депутаттар, мугалимдер жана жергиликтүү тургундар катышты.

Шаардык мэриядан билдиришкендей, жаңы корпус менен №49 мектептин жалпы сыйымдуулугу 630 окуучуга жетип, балдардын сапаттуу билим алуусу үчүн заманбап шарттар түзүлдү. Мектепте билим берүү кыргыз, орус жана өзбек тилдеринде жүргүзүлөт.

Шаар бийлиги окуучулардын коопсуздугун жана ыңгайлуулугун камсыздоо максатында жакын арада атайын мектеп автобусун ишке киргизүүнү да пландоодо. Бул мектеп учурда Ош шаарында курулуп жаткан 17 билим берүү мекемесинин бири болуп саналат.