Мэр Ала-Тоо аянтындагы ырдан улам чара колдонулган диджей менен жолугушту

Бишкек шаарынын мэри Айбек Жунушалиев Ала-Тоо аянтындагы майрамдык иш-чарада адепсиз ырлар жаңырганы үчүн жоопкерчиликке тартылган жаш диджей кыз менен жолугушту.

Борбор калаа бийлиги кабарлагандай, ШКУнун Дельфий оюндарында коло медаль жеңип алган кыз менен болгон жолугушууда майрамдык иш-чарада орун алган жагдай талкууланып, борбор калаанын башчысы ага колдоо көрсөтөрүн билдирген.

Айбек Жунушалиев болгон катачылыктар үчүн жоопкерчилик жооптуу кызматкерлерге таандык экенин белгилеп, алар бардык процесстерге тийиштүү көзөмөлдү жана координацияны камсыздай албаганын айткан.

Ошондой эле борбор калаа башчысы кызды ыктыярчылык ишмердүүлүгүн улантууга жана мындан ары да "Наристе" балдар фестивалынын жана башка иш-чаралардын конокторуна, катышуучуларына жардам берип, шаардын коомдук жашоосуна активдүү катышууга чакырган.

"Кыздын апасы болгон окуя техникалык катачылыктын натыйжасында орун алганын белгилеп, бул жагдай кызы үчүн олуттуу сабак жана маанилүү тажрыйба болгонун айтты. Анын айтымында, бул окуя келечекте уюштуруучулук жана техникалык маселелерге дагы кылдат мамиле кылууга жардам берет",- деп айтылат маалыматта.