Ошто Ак-Буура дарыясынан таза суу тартуу иштери 90 пайызга аяктады

Ош шаарында Ак-Буура дарыясынан таза суу менен камсыздоону жакшыртуу багытындагы ири долбоордун курулушу уланууда. Бул тууралуу 3-июнда шаар мэринин орун басары Эрнист Толтоев Данги участогундагы иштер менен таанышуу учурунда маалым болду.

Шаардык мэриядан билдиришкендей, долбоор Азия өнүктүрүү банкынын колдоосу менен ишке ашырылып, Ак-Буура дарыясындагы ирригациялык жана суу менен камсыздоо инфраструктурасын жакшыртууга багытталган.

Иштин алкагында башкы суу алуучу курулма жана Төлөйкөн айылына чейин узундугу 4,8 чакырымды түзгөн эки магистралдык суу түтүгү курулууда.

Азыркы тапта негизги иштердин жүрүшү жогорку деңгээлде болуп, магистралдык түтүктүн биринчи линиясы орнотулуп, темир-бетон конструкциялары жана тосмо иштеринин 90 пайызы аткарылды.

Долбоор ишке берилгенден кийин калкты таза суу менен туруктуу камсыз кылуу, суунун жеткиликтүүлүгүн жогорулатуу жана шаардык инфраструктураны жакшыртуу күтүлүүдө.