Ошто Монуев көчөсү толук жаңыланууда

Ош шаарында Монуев көчөсүнөн темир жол бекети аркылуу Раззаков көчөсүнө чейин алып чыккан жол капиталдык оңдоодон өтүүдө. Бул тилке мурда Т.Турсунбаева көчөсү деп аталып, узак убакыттан бери оңдоого муктаж болуп келген. Бул тууралуу шаардык мэриядан билдиришти.

Маалыматка ылайык, жол “Т” түрүндөгү кесилиштер менен татаал аймактан өтүп, шаар ичиндеги кыймыл үчүн маанилүү багыттардын бири болуп саналат. Учурда жолдун негизги бөлүгү жаңыланып, инфраструктура толук жаңыртылууда.

Ош шаарынын мэри Жанарбек Акаев жеринде иштин жүрүшү менен таанышып, аймактагы “Азия” соода борборуна тротуарларын жана пандустарын иретке келтирип, оңдоо иштерин жүргүзүү тапшырмасын берди.

Шаар бийлигинин маалыматына ылайык, быйыл Ош шаарында жалпы 50 чакырым жол оңдолуп, иштерди окуу жылы башталганга чейин бүтүрүү пландалууда.