Касымалиев финансы кызматкерлерин кесиптик майрамы менен куттуктады

Министрлер кабинетинин төрагасы Адылбек Касымалиев финансы жана экономика кызматкерлерин кесиптик майрамы менен куттуктады.

Өкмөт башчы өз сөзүндө бүгүнкү күндө өлкөнүн финансы-экономикалык системасы динамикалуу өнүгүүнү көрсөтүп жатканын белгиледи.

"2025-жылдын жыйынтыгы боюнча Кыргыз Республикасы 11,1 пайыз деңгээлинде экономикалык өсүшкө жетишип, аймактагы алдыңкы өлкөлөрдүн катарына кирди. 2026-жылдын биринчи төрт айында да оң тенденция сакталып, экономиканын өсүшү 12,4 пайызды түздү.

Өлкөнүн бюджети 2025-жылы 1 триллион сомдон ашык көлөмдө түзүлүп, профицит менен аткарылды, ал эми кирешелер 40 пайыздан ашык өсүп, экономиканын ачык-айкындуулугунун жогорулаганын жана салыктык базанын кеңейгенин көрсөттү.

Инвестициялык саясат олуттуу натыйжаларды берди – 2021–2025-жылдар аралыгында Кыргыз Республикасына 34,5 миллиард доллар өлчөмүндө инвестиция тартылып, эл аралык өнөктөштөрдүн ишениминин өсүп жатканын ырастоодо.

Индустриялаштыруу саясатын ишке ашыруунун алкагында 2025-жылы эле 119 жаңы ишкана ишке берилди, 8 миңден ашык жумуш орундары түзүлдү, ал эми 2026-жылы дагы 113 өнөр жай объектисин ачуу пландалууда.

Ошону менен катар ички экономикалык активдүүлүк да кеңейүүдө: керектөө суроо-талабы, насыялоонун көлөмү жана калктын кирешелери өсүүдө, бул ички рыноктун туруктуулугун бекемдеп, экономиканын андан ары өнүгүшүнө кошумча өбөлгөлөрдү түзүүдө.

Ошону менен бирге экономика калыбына келүү этабынан туруктуу индустриалдык-инновациялык өнүгүүгө өтүүчү сапаттык трансформация этабын башынан өткөрүүдө. Бул эл аралык ишенимдин өсүшү жана Moody’s, Fitch жана S&P рейтинг агенттиктеринин баалоолорунун жакшырганы менен да ырасталууда.

Ошол эле учурда инфляциялык процесстерди жана тышкы баа факторлорун камтыган айрым сыноолордун бар экенин түшүнөбүз. Бул багытта мамлекет тарабынан баа туруктуулугун, азык-түлүк коопсуздугун жана макроэкономикалык туруктуулукту камсыз кылууга багытталган комплекстүү чаралар көрүлүүдө", - деди өкмөт башчы.