Марлен Маматалиев Сокулук районундагы көгөйлөр менен жеринде таанышты

Бүгүн, 16-июнда Жогорку Кеңештин төрагасы Марлен Маматалиев Чүй облусунун Шопоков шаарындагы бир катар социалдык жана инфраструктуралык объектилерди жеринде көрдү.

Парламенттин басма сөз кызматы билдиргендей, иш сапардын жүрүшүндө спикер саркынды сууларды тазалоочу курулманын абалы менен таанышып, объекттин толук эскиргендигин белгиледи. Ал тиешелүү жетекчилерге сметалык документтерди даярдоону жана жаңылоо иштерин 2027-жылга чейин бүтүрүүнү тапшырды.

Ошондой эле Сокулук райондук эмгек жана социалдык камсыздоо башкармалыгынын имараты менен таанышып, мекемени заманбап имарат менен камсыздоо зарылдыгын белгиледи. Бул багытта долбоордук-сметалык документтерди даярдоо жана каржылоо маселесин чечүү тапшырылды.

Мындан тышкары Шопоков шаарындагы борбордук стадиондун абалы да текшерилип, спорттук жайды капиталдык оңдоодон өткөрүү зарылдыгы айтылды. Тиешелүү кызматтарга жаңылоо иштерин тездетүү тапшырмасы берилди.

Иш сапардын соңунда жергиликтүү тургундар менен жолугушуу өтүп, жолдор, таза суу, газ, электр энергиясы, билим берүү жана жумуш орундарын түзүү сыяктуу бир катар маселелер көтөрүлдү. Көтөрүлгөн көйгөйлөрдү чечүү боюнча тиешелүү иштер улантылары белгиленди.