Ошто үйү бузулган тургундарга жаңы турак жайлар берилүүдө

Ош шаарындагы Ош көчөсүн кеңейтүү долбоорунун алкагында жол курулушуна байланыштуу снос иштери уланууда. Айрым тургундар турак жайларын өз ыктыяры менен бузуп жатышса, жолдун курулушуна тоскоолдук жараткан объектилер мыйзам чегинде шаардык кызматтар тарабынан алынууда. Бул тууралуу шаардык мэриядан билдиришти.

Маалыматка ылайык, шаар мэриясынын атайын комиссиясы учурда кенемте төлөө маселесин карап жатат. Алгачкы этапта үйү толугу менен бузулган жарандарга кенемте каралып, аларга “Эне-Сай” жаңы конушунан даяр үй же жер тилкеси сунушталууда. Азыркы тапта бир катар тургундар жаңы турак жайларга көчүп баштады.

Мэриянын маалыматына ылайык, кенемте төлөө процесси мыйзам талаптарына ылайык ачык-айкын жүргүзүлүп, жарандардын укуктары толук камсыздалат.