ШКУ өлкөлөрүнүн адам укуктарын коргоо боюнча институттары меморандумга кол койду

Бишкек шаарында Шанхай кызматташтык уюмуна мүчө мамлекеттердин адам укуктарын коргоо боюнча улуттук укук коргоо институттарынын биринчи консультативдик жолугушуусу өттү. Бул тууралуу бүгүн, 23-июнда Акыйкатчы институтунан билдиришти.

Иш-чарага Беларусь, Иран, Казакстан, Кытай, Орусия, Тажикстан, Пакистан жана Өзбекстандын тиешелүү институттарынын өкүлдөрү катышты. Индия өкүлдөрү онлайн форматта кошулду.

Жыйында президент Садыр Жапаровдун кеңешчиси Чолпонбек Абыкеев өлкө башчысынын куттуктоосун окуп берди. Ал эми акыйкатчы Жамиля Жаманбаева бул жолугушуу мамлекеттер аралык ишенимди бекемдөөгө жана гуманитардык кызматташтыкты кеңейтүүгө өбөлгө болорун белгиледи.

Орусия, Өзбекстан, Иран жана ШКУнун өкүлдөрү адам укуктары жаатындагы эл аралык кызматташтыкты өнүктүрүү жана тажрыйба алмашуу маанилүү экенин баса белгилешти.

Иш-чаранын жыйынтыгында тараптар ортосунда кызматташтыкты бекемдөө боюнча меморандумдарга кол коюлду.