Үч айда чет өлкөлөрдөн 386,7 миллион доллар инвестиция тартылды  

Январь-март айларында чет өлкөлөрдөн 386,7 миллион доллар түз инвестициялар тартылды. Бул тууралуу президентке караштуу Инвестициялар боюнча улуттук агенттик кабарлады.

Маалымдалгандай, бул көрсөткүч былтыркы жылдын ушул мезгилине (288,2 миллион доллар) салыштырмалуу 34 пайызга көп. Түз инвестициянын эң көп бөлүгү финансылык ортомчулук жана камсыздандыруу секторуна туура келип, 93,6 миллион долларды түзгөн. Андан кийинки орунду кайра иштетүү өнөр жайы секторуна туура келип, болжол менен 90,1 миллион доллар өлчөмүндө инвестиция тартылган.

"Быйылкы жылдын I чейрегинде түз инвестициянын жалпы көлөмүнүн 30 пайызы Бишкек шаарына туура келип, 115,8 миллион долларды түздү. Талас облусуна 80,3 миллион доллар инвестиция тартылып, бул жалпы көлөмдүн 20,7 пайызын түзгөн. Нарын облусуна 69,7 миллион доллар, ал эми Чүй облусуна 68,6 миллион доллар тартылган. Андан кийинки орунда Жалал-Абад облусу болуп, ага тартылган инвестициялардын жалпы көлөмү 43,3 миллион долларды түзгөн",- деп айтылат билдирүүдө.