Бишкек мэри шаардагы курулуш жана оңдоо иштеринин жүрүшүн текшерди

Бишкек шаарынын мэри Айбек Жунушалиев борбор калаада курулуп жаткан социалдык объекттерди, жолдорду жана көрктөндүрүү иштерин текшерди.

Мэрия билдиргендей, мэр алгач Ахунбаев жана Репин көчөлөрүнүн кесилишинде курулуп жаткан "Үмүт чырагы" адистештирилген бала бакчасынын курулушуна барды. Эки кабаттуу имарат 250 балага ылайыкташып, өзгөчө камкордукка муктаж балдар үчүн курулууда. Шаар башчысы тогуз кабаттуу көп деңгээлдүү унаа токтотуучу жайдын курулушун көрүп, жолдорду кеңейтүүгө тоскоол болгон объекттерди демонтаждоо маселесин кароону тапшырганы маалымдалды.

Мындан тышкары, Жал-29 кичи районундагы спорттук комплекстин курулушу, Миңжылкиев көчөсүнүн реконструкциясы жана Көлмө конушундагы футбол аянтчасынын жаңылануусу текшерилди.

Жунушалиев тиешелүү кызматтарга жана подряддык уюмдарга иштерди сапаттуу аткарууну, курулуш иштеринин темпин күчөтүүнү жана объекттерди белгиленген мөөнөттө бүтүрүүнү тапшырганы кошумчаланды.