Ошто коомдук транспорттун 15 каттамын өзгөртүү маселеси каралды

Ош шаарында коомдук транспорт каттамдарын оптималдаштыруу боюнча комиссиянын кезектеги жыйыны өтүп, 5 автобустук жана 10 кичи автобустук маршруттун кыймыл чиймелери талкууланды.

Мэриянын маалыматына ылайык, каттамдарды кайра карап чыгуу шаар тургундарынын транспорттук жеткиликтүүлүгүн жакшыртуу, жол жүрүү убактысын кыскартуу жана коомдук транспорттун ишинин натыйжалуулугун жогорулатууга багытталган.

Ошондой эле кийинки жыйында дагы 10 кичи автобустук каттамдын кыймыл чиймеси каралып, аларды шаардагы жаңы инфраструктуралык өзгөрүүлөргө жана жүргүнчүлөрдүн муктаждыктарына ылайыкташтыруу маселеси талкууланат.

Комиссия этап-этабы менен ишин улантып, Ош шаарында коопсуз жана ыңгайлуу коомдук транспорт системасын түзүүгө багытталган сунуштарды иштеп чыгат.