ТИМ Орусияда жардырылган кампада жабыркагандар боюнча маалымат берди 

Кыргызстандын Тышкы иштер министрлиги Орусиянын Москва облусунун Электросталь жана Тамбов облусунун Котовск шаарларындагы кампадагы өрттөн жабыркаган кыргызстандыктар боюнча маалыматты тактоону улантууда.

Бүгүн, 20-июлга карата Кыргызстандын эки жараны ар кандай деңгээлдеги жаракат алганы белгилүү болду. Учурда алар Электросталь шаарындагы ооруканада дарыланып, абалы канааттандырарлык экени маалымдалды. Ал эми каза болгондордун арасында Кыргызстандын жарандары бар же жоктугу тактала элек.

Ошондой эле өрттөн кийин документтерин жоготкон эки жаранга мекенине кайтып келүү үчүн убактылуу күбөлүк берилди.

Эскерте кетсек, аталган эки аймакта Wildberries компаниясына таандык кампаларга дрон түшүп, өрт каптаган.