Үркүндүн 110 жылдыгына карата эскерүү жүрүшү өтөт

25-31-июль күндөрү Ысык-Көл облусунун Тосор айылынан Сөөк ашуусуна чейин Үркүндүн 110 жылдыгына арналган эскерүү жүрүшү уюштурулат. Бул тууралуу "Эсимде" изилдөө аянтчасы жана "Тосор коому" жергиликтүү уюму билдирди.

Иш-чаранын негизги максаты - 1916-жылдагы Үркүн трагедиясынын курмандыктарын эскерүү, тарыхый эстутумду сактоо жана аны кийинки муундарга жеткирүү.

Эскерүү жүрүшү быйыл 6-жолу өткөрүлөт. Катышуучулар 1916-жылы качкындар басып өткөн тарыхый маршруттардын бири менен жөө басып өтүшөт. Быйылкы маршруттун узундугу болжол менен 100 чакырымды түзүп, ага Кыргызстандын ар кайсы аймактарынан жана коңшу өлкөлөрдөн келген 50гө жакын адам катышары күтүлүүдө.

Ошондой эле 25-июлда Тосор айылында Үркүндүн курмандыктарын эскерүүгө арналган иш-чара өтүп, ага бардык каалоочулар катыша алышат.