Агартуу министрлиги коррупцияга каршы жаңы стилдеги ролик жарыялады (видео)

Бүгүн, 24-июлда, Кыргыз Республикасынын Агартуу министрлиги билим берүү тармагындагы коррупциянын алдын алууга багытталган жаңы анимациялык ролик жарыялады. Бул тууралуу министрликтин Фейсбуктагы расмий баракчасында маалымдалды.

Роликте "Чынчылдык – сенин күчүң, адилеттүүлүк – сенин укугуң" деген ураан колдонулуп, коррупциялык көрүнүштөргө кайдыгер болбоого чакырык жасалган.

Анимациялык формат жаштарга, окуучуларга жана жалпы коомчулукка маалыматты жеткиликтүү жеткирүү максатында тандалган. Кыска видеолор аркылуу коррупцияга каршы маданиятты калыптандыруу жана ар бир жарандын жоопкерчилигин жогорулатуу көздөлгөн.

Ошондой эле роликте мамлекеттик ишмер Исхак Раззаковдун: "Мен таза болсом, сен таза болсоң, коом да таза болот" деген сөзү колдонулган. Бул сөз аркылуу тазалык, жоопкерчилик жана коомдун өнүгүүсүнө ар бир адамдын салымы маанилүү экени белгиленет.

Министрлик билим берүү тармагында коррупциялык көрүнүштөргө күбө болгон жарандарды унчукпай калбоого чакырды. Мындай учурлар тууралуу "Э-Күндөлүк" тиркемесиндеги "Коркпо! Билдир!" анонимдүү функциясы аркылуу билдирүүгө болорун жана маалыматтар купуя сакталарын айтты.