ЖМК: АКШ Ирандын байытылган уранын колго түшүрүү боюнча аскердик операцияны карап жатат

АКШнын атайын кызматтары Ирандын өзөктүк объектилериндеги байытылган уранды көзөмөлгө алуу боюнча аскердик операциянын мүмкүнчүлүгүн карап жатканын New York Post басылмасы жазды.

Басылманын маалыматына ылайык, операцияга миңдеген аскерлер тартылып, жакшы кайтарылган өзөктүк объектилерге чабуул коюлушу мүмкүн. Маалымат булактары мындай операция аскер тарыхындагы эң татаал операциялардын бири болушу ыктымал экенин белгилешкен.

АКШнын Стратегиялык жана эл аралык изилдөөлөр борборунун директорунун орун басары Жозеф Роджерстин айтымында, Ирандын өзөктүк программасы боюнча сүйлөшүүлөрдөн жакын арада жыйынтык чыгышы күмөн болгондуктан, аскердик вариант каралышы мүмкүн.

Маалыматка караганда, операциянын планы Ирандагы Фордо жана Исфахан шаарларындагы өзөктүк объектилерден байытылган уранды алып чыгууну камтыйт. Бул үчүн атайын багыттагы аскерлер урандыларды тазалап, өтө кооптуу шартта иш алып барышы керек болот.

Ошол эле учурда CNN телеканалы мурдараак Иран Исфахандагы өзөктүк объектилердин туннелдерине мүмкүн болгон чабуулга даярдык катары мина жана жардыргыч заттарды жайгаштырганын билдирген.

Эл аралык атомдук энергия боюнча агенттиктин (МАГАТЭ) маалыматына ылайык, 2025-жылга карата Иранда 9 тоннадан ашык байытылган уран бар.