Жайында бат бузулган 5 азык: Аларды кантип узагыраак сактоого болот?

Жайдын аптаптуу күндөрүндө айрым азыктар бат эле сапатын жоготуп, бузулуп калышы мүмкүн. Айрыкча мөмө-жемиштер, сүт азыктары жана балык туура сакталбаса, кыска убакытта жараксыз болуп калат. Адистер сунуштаган бир нече жөнөкөй ыкма азыктарды узагыраак жаңы бойдон сактоого жардам берет.

1. Жаңы мөмөлөр
Кулпунай, малина, карагат жана башка мөмө-жемиштер нымдуулуктан улам бат жумшарып, чирий баштайт. Аларды сатып алгандан кийин бузулган мөмөлөрүн дароо бөлүп, жегенге чейин жуубоо сунушталат. Муздаткычта кагаз сүлгү төшөлгөн кең идишке бир катмар кылып салуу керек. Көп болсо, тоңдуруп койсо болот.

2. Жумшак сырлар жана моцарелла
Моцарелла, рикотта, фета жана быштак сырлары таңгак ачылгандан кийин тез эле кычкылдап кетиши мүмкүн. Моцарелла менен фетаны таза идишке салып, жаңы туздуу сууга салып, капкагын бекем жабуу сунушталат. Рикотта жана быштак сырларын болсо өзүнүн таңгагында сактап, таза кашык же бычак менен алуу зарыл.

3. Авокадо
Бышкан авокадо бөлмө температурасында тез эле бышып өтүп кетет. Эгер дароо жебей турган болсоңуз, аны муздаткычка салуу сунушталат. Кесилген авокадонун бетине лимон ширесин сүйкөп, тамак-аш пленкасы менен бекем ороп коюу анын карарып кетишин жайлатат.

4. Жаңы нан
Багет, чиабатта сыяктуу нандардын кабыгы ысыкта жана нымдуулукта бат өзгөрөт. Нанды муздаткычта сактоо анын тез катууланышына алып келиши мүмкүн. Ошондуктан нанды бөлмө температурасында кагаз баштыкта же нан салгычта кармоо туура. Эгер бир-эки күндө жеп бүтпөсөңүз, кесимдерге бөлүп, тоңдуруп коюуга болот.

5. Жеңил туздалган балык
Форель, лосось сыяктуу жеңил туздалган балыктар туура сакталбаса, тез эле сапатын жоготот. Таңгак ачылгандан кийин балыкты жабык айнек идишке салып, муздаткычта сактоо керек. Балык көп болсо, порцияларга бөлүп тоңдуруп коюу ыңгайлуу.

Жалпысынан жайында азыктарды түз тийген күн нурунан алыс кармап, тез бузулуучу азыктарды муздаткычка өз убагында жайгаштыруу маанилүү. Ошондой эле азыктын таңгагындагы сактоо мөөнөтүн жана шарттарын эске алуу зарыл.