Ысык-Көлдөгү мөңгүлөрдүн аянты 90 жылда үчтөн бирге азайды

Акыркы 70–90 жыл аралыгында Ысык-Көл ойдуңундагы мөңгүлөрдүн жалпы аянты 33,7 пайызга кыскарган. Бул тууралуу Кыргызгидромет кызматы билдирди.

Маалыматка ылайык, мөңгүлөрдүн азайышы боюнча көрсөткүчтөр аймактын жаңыланган каталогун түзүү учурунда аныкталган. Адистер жаңы маалыматтарды мурдагы изилдөөлөрдүн жыйынтыктары менен салыштырышкан.

Ошондой эле акыркы 7–10 жыл аралыгында Ысык-Көл ойдуңундагы мөңгүлөрдүн аянты дагы 23,1 пайызга кыскарганы белгиленди.

Жаңыланган каталогдо мөңгүлөрдүн бирдиктүү тизмеси түзүлүп, алардын такталган чек аралары, өлчөмдөрү жана башка негизги көрсөткүчтөрү камтылган.

Изилдөө иштеринде адистер Copernicus программасынын Sentinel-2 спутниктик сүрөттөрүн, QGIS геомаалыматтык системасын жана Google Earth платформасын колдонушкан. Анын негизинде мөңгүлөрдүн учурдагы абалы такталып, айрымдары бөлүнүп кеткен, жаңылары пайда болгон же толугу менен жок болгону аныкталган.

Кыргызгидрометтин маалыматына караганда, жаңыланган каталог өлкөнүн криосферасына (кар жана мөңгү катмарына) байкоо жүргүзүүдө маанилүү маалымат булагы болуп саналат. Ал мамлекеттик органдарды, илимий мекемелерди жана инженердик уюмдарды мөңгүлөрдүн азыркы абалы тууралуу так маалымат менен камсыз кылууга жардам берет.