Түндүк Корея АКШнын киберчабуулдар боюнча айыптоолорун четке какты

Бүгүн, 4-августта Түндүк Корея АКШ жана анын өнөктөштөрүнүн киберчабуулдар боюнча айыптоолорун негизсиз деп атады. Бул тууралуу чет өлкөлүк маалымат агенттиктери билдиришти.

КЭДРдин Тышкы иштер министрлиги мындай билдирүүлөр өлкөнүн аброюна шек келтирип, ага карата басымды күчөтүүнү актоого багытталганын белгиледи.

Пхеньян ошондой эле дүйнөдөгү эң ири кибер мүмкүнчүлүктөргө ээ АКШнын башка мамлекеттерди киберкоопсуздукка коркунуч жаратууда деп айыпташын "логикага сыйбаган кадам" деп сындады.

Буга чейин АКШ, Түштүк Корея, Япония жана дагы 8 өлкө КЭДРди жасалма маалыматтарды жана жасалма интеллект технологияларын колдонуу менен чет өлкөлөрдө аралыктан иштеген кызматкерлерди жайгаштырып, андан түшкөн каражатты өлкөнүн ракеталык жана өзөктүк программаларын каржылоого жумшап жатат деп айыптаган.