Акылбек Жапаров Кыргыз-Орусия кызматташтыгы тууралуу айтты (видео)

Бүгүн, 5-августта Ысык-Көлдө өтүп жаткан Кыргыз-Орусия экономикалык форумунда Акылбек Жапаров өлкөнүн экономикасын өнүктүрүү үчүн убакытты туура пайдаланып, маанилүү чечимдерди тез кабыл алуу зарылдыгын белгиледи.

Анын айтымында, буга чейин Wildberries платформасы жакшы мүмкүнчүлүк катары бааланганы менен, азыр компаниядагы көйгөйлөрдөн улам кыргызстандык ишкерлер зыян тартып, айрымдары банкрот болушууда.

"Wildberries аябай жакшы дедик эле, азыр эми Wildberries Орусияда жарылып, Кыргызстандын зээни кейип жатат. Кыргызстандын бизнесмендери банкрот болуп жатышат. Ошондуктан ушундай нерселерде бири-бирибизге жардам берип, кайсы жерде кемчилик кетип жатса, ошону тез арада оңдой турган өкмөт гана өлкөнү алдыга жылдыра алат",- деди Жапаров.

Ошондой эле ал энергетикалык ресурстарды Кыргызстанга жеткирүүнүн маанилүүлүгүнө токтолуп, Ормуз кысыгындагы мунай жана газды өлкөгө ким эртерээк алып келе алса, бул экономиканын өсүшүнө өбөлгө түзөрүн белгиледи.

Мындан тышкары, Акылбек Жапаров 2025-жылдан тарта жыл сайын 1 миллиард долларга жакын инвестициялык долбоорлорду ишке ашыруу пландалганын билдирди. Инвестицияларды Орусиядан тышкары, Кытайдан жана башка өлкөлөрдөн тартуу менен бирге, жаңы технологияларды өздөштүрүп, жумуш орундарын түзүү зарылдыгын айтты. Ал мындан ары бул багытта иштерди ыкчам жүргүзүү керектигин кошумчалады.