"Дүйнө эли суктангыдай". Сооронбай Жээнбеков кыргыз элин куттуктоосу менен ынтымакка үндөдү

Өлкөнүн мурдагы президенти Сооронбай Жээнбеков кыргызстандыктарды эгемендүүлүк күнү менен куттуктады.

"Быйыл өлкөбүздүн эгемендүүлүгүнүн 35 жылдыгын белгилеп жатабыз. 35 жыл - тарыхтын ченеми менен алганда бир көз ирмем. Ал эми мамлекетибиздин, ар бирибиздин тагдырыбызда - бир муун жетилип, турмуш жолуна түшкөн мезгил. Ушул жылдар аралыгында далай сыноолорду баштан кечирдик, жеңиштерге кубанып, кыйынчылыктардан сабак алдык.

Мамлекеттүүлүктүн негизин түзгөн башкы баалуулуктардын баркын түшүндүк. Биздин эң чоң байлыгыбыз - элибиздин ынтымагы, жергебиздеги тынчтык жана мамлекетибиздин бүтүндүгү. Бул баалуулуктарды жеке кызыкчылыктан жогору коюп, эгемендүүлүктүн жоопкерчилигин көтөрө билели. Эгемендүүлүк - бизге ата-бабалардан калган ыйык мурас. Аны бекемдеп, кийинки муундарга татыктуу өткөрүп берүү - биздин милдетибиз. Өлкө тагдыры - ар бирибиздин тагдырыбыз. Өлкөдөн өткөн дөөлөт жок!" - деп жазды ал соцтармактагы баракчасына.

Жээнбеков ШКУнун саммитин жана Көчмөндөр оюнун жапа тырмак ийгиликтүү өткөрүүгө үндөп, ага "дүйнө эли суктангыдай" болсун деген ниетин билдирди.