Чүйдө Желмаян айдаган өспүрүм жөө жүргүнчүнү сүзүп кетти (видео)

Кечээ, 6-сентябрда саат 22:00 чамасында Чүй облусунун Ысык-Ата районундагы Милянфан айылында жол кырсыгы катталды. Облустук ЖКККБнын маалыматы боюнча, Желмаян башкарып бара жаткан 16 жаштагы жигит 15 жаштагы жөө жүргүнчүнү сүзүп кеткен.

Кырсыктан жабыркаган өспүрүм Кант шаардык ооруканасына жеткирилди.

Алдын ала коюлган диагноз: баш мээнин жабык жаракаты, мээнин чайкалышы, оң жамбаш аймагындагы жумшак ткандардын жана оң тизе муунунун көгөрүшү.

Учурда жол-транспорт кырсыгы боюнча тиешелүү тергөө иштери жүргүзүлүп, окуянын бардык жагдайлары такталууда. Электр скутер айып короосуна киргизилген.