Украина жана Жакынкы Чыгыш: Гутеррештен кооптуу эскертүү

БУУнун башкы катчысы Антониу Гутерреш Украинадагы жана Жакынкы Чыгыштагы куралдуу жаңжалдар дүйнө үчүн өтө олуттуу коркунуч жаратып жатканын билдирди. Бул тууралуу чет элдик басылмалар жазышты.

Гутеррештин айтымында, Орусия менен Украинанын ортосундагы согушта жана жалпы Жакынкы Чыгыштагы кырдаалда күн өткөн сайын абал курчуп баратат. Ал азырынча эч бир багытта жакшыруу байкалбай жатканын белгиледи.

“Кырдаал ушундай нукта улана берсе, глобалдык деңгээлде катастрофалык жана өтө оор кесепеттерге алып келиши мүмкүн болгон чоң жарылуу коркунучуна туш болобуз”, - деди БУУнун башкы катчысы Нью-Йорктогу басма сөз жыйынында.

Ошондой эле Гутерреш БУУ алдыдагы айларда дүйнө алдында турган бул чакырыктарга каршы күрөшүү үчүн бардык мүмкүнчүлүктөрүн колдонорун билдирди.