Кыргызстанда БАЭнин инвесторлору менен асыл тукум мал чарбасын өнүктүрүү долбоору талкууланды

Суу ресурстары, айыл чарба жана кайра иштетүү өнөр жайы министрлигинин биринчи орун басары Илич Марсбек уулу Бириккен Араб Эмираттарынан келген делегация менен жолугушту.

Жолугушууда Кыргызстанда заманбап асыл тукум мал чарбасын түзүүгө багытталган инвестициялык долбоорду ишке ашыруу мүмкүнчүлүктөрү талкууланды.

Тараптар жогорку өндүрүмдүү асыл тукум малдарды Кыргызстанга алып келүү, аларды багуу үчүн заманбап шарттарды түзүү жана ветеринардык тейлөөнү жакшыртуу маселелерин карашты.

Ошондой эле мал чарба комплекстерин түзүү, сапаттуу тоют базасын өнүктүрүү, селекциялык-генетикалык иштерди күчөтүү жана тармак үчүн адистерди даярдоо боюнча пикир алмашуу болду.

Жолугушууда инвестициялык долбоорду ишке ашырууда ветеринардык жана санитардык талаптарды сактоо, тиешелүү инфраструктураны түзүү жана Кыргызстандын мыйзамдарынын талаптарын эске алуу маанилүү экени белгиленди.

Жыйынтыгында тараптар долбоордун мүмкүнчүлүктөрүн мындан ары биргелешип карап чыгып, конкреттүү сунуштарды иштеп чыгууга жана кызматташтыкты улантууга даяр экенин билдиришти.