Кыргызстандык самбочулар Дүйнө чемпиондугунда 7 медаль жеңишти

Кыргызстандын курама командасы 6-8-ноябрь күндөрү Өзбекстандын Ташкент шаарында өткөн самбо боюнча 50-Дүйнө чемпиондугунда жети медаль жеңди.

Маалыматка ылайык, мелдешке 101 өлкөдөн 500дөн ашык спортчу катышты. Алтын медалды көзү азиз спортчулар арасындагы самбодо (SVI-1) 50 килограммга чейинки салмакта Надежда Рак жеңип алды. Ал финалда Өзбекстандын өкүлүн утту. Күмүш медалга күжүрмөн самбодо 54 килограммга чейинки салмакта Акак Үсөн кызы ээ болду.

"Ал эми коло медалдарга Феликс Уланбеков, Кимал Оболбеков, Сүймөнкул Молдобеков, Даниель Асеков жана Мераида Медетбек кызы татыды",- деп кошумчаланды маалыматта.