Ала-Арчадагы окуядан кийин депутаттык комиссия түзүлдү (видео)

Ала-Арча окуясынан кийин Жогорку Кеңеш мамлекеттик органдардын ыкчам кызматтарынын ишмердүүлүгүн жана калкка көрсөткөн кызматтарынын сапатын иликтөө боюнча убактылуу депутаттык комиссия түздү. Бул тууралуу бүгүн, 11-ноябрда парламент жыйынында төрага Марлен Маматалиев билдирди.

Анын айтымында, депутаттык комиссия Ала-Арчада болгон окуяны гана карабастан, жалпы мамлекеттик органдардын, анын ичинде тез жардам кызматынын чакырууларга кечигип келиши жана калкты тейлөөдө жаралган жалпы көйгөйлөр каралат.

"Калкты тейлөө борборлорунан тартып, элге кызмат көрсөткөн бардык мамлекеттик органдардын ишмердүүлүгүн, иштөө ыкмаларын жана кемчиликтерин карап чыгышыбыз керек. Мындай окуялардын алдын алып, келечекте кайталанбашы үчүн депутаттык комиссия түзүлдү",- деди Маматалиев.

Комиссия түзүү маселеси күн тартибине киргизилип, депутаттар тарабынан бир добуштан колдоого алынды. Анын курамына парламенттеги ар бир депутаттык топтон бирден өкүл кирди.

Эске салсак, 15 жаштагы Амир Кунакунов 7-ноябрда Ала-Арча капчыгайында дайынсыз жоголуп, эки күндөн кийин жансыз денеси табылган.