Малайзиялык журналисттер Бишкекке келишти

Бүгүн, 24-июлда Бишкекке Малайзиянын алдынкы медиа-холдингдеринин журналисттеринен турган делегация келди. "Манас" Эл аралык аэропортунан чет өлкөлүк конокторду Кыргыз Республикасынын Малайзиядагы элчиси Кылычбек Султанов тосуп алды.

Делегациянын курамында “The Star” жана “Media Prima” медиа-холдингдеринин жана “Bernama” маалымат агенттигинин өкүлдөрү бар. Иш сапар алкагында алар кыргыз өлкөсүнүн маданий жана тарыхый жайлары менен таанышмакчы.

Малайзиялык журналист Суриати Сануси SUPER.KG порталына берген маегинде Бишкектин жолдорундагы тартипсиздикке таң калганын белгиледи. Айрыкча жолдордун боюнда турган көптөгөн унаалар чет өлкөлүк конокту таң калтырыптыр. Малайзиялык журналист Ох Чин Энг кыргыз жеринин салкын абасы жана бийик тоолору суктандырганын айтып, иш сапарынын алкагында өлкөнүн ажайып жайларын чагылдырган репортаждарды даярдап берерин баса белгиледи.

Айта кетсек, чет өлкөлүк коноктор КРнын Малайзиядагы элчилигинин чакыруусу менен келишти. Иш-чаранын максаты - Кыргыз Республикасын эл аралык аренада көрсөтүү жана тааныштыруу.

Быйыл 6-июнда тажрыйба топтоп келүү үчүн мамлекетибиздин жалпыга маалымдоо каражаттарынын өкүлдөрү Малайзияга барышкан эле. Ал жакта журналисттер Малайзиядагы алдынкы ММКларда болушкан.