Жалал-Абаддан Бишкекке ата-энесинен качкан кыз: “Өгөй атам менен апам мени кичинекей кезимден бери сабап келишкен”

29-январда эртең менен 17 жаштагы Назбийке аттуу кыз Жалал-Абад облусунун Көк-Жаңгак шаарынан Бишкекке качып келгени белгилүү болгон. Ал Бишкектеги тааныш адамдарына барып жардам сураган. Алар Назбийкенин ыйлата турган окуясын угушуп, денесиндеги көк алаларды көрүшүп, ага жардам көрсөтүү үчүн SUPER.KG порталына кайрылышкан.

"Бул кыздын биздикине экинчи жолу качып келиши. Биринчисинде ата-энеси келип, аны алып кетишкен болчу. Ата-эне деген жоголгон баласын өпкүлөп, кучактайт эмеспи. Ал эми Назбийкеге ата-энеси тарабынан мындай мээримди көрө алган жокпуз. Мындай нерсеге көз жумуп коё албайт экенсиң. Көрүп зээниң кейийт. Ошого экинчи жолу бизге качып келгенде көк аласын көрүп, жөн тура алган жокпуз. Колубуздан келишинче жардам берели деп чечтик. Биз үчүн Назбийке бир тууган карындаштай болуп калды",- дешти алар.

17 жаштагы Назбийке SUPER.KG’ге берген маегинде кичинекей кезинен бери ата-энеси тарабынан кордук көрүп келе жатканын айтып берди.

“Өгөй атам менен апамдын төрт баласы бар: эки эжем, мен жана иним. Улуу эжем экөөбүз апабыздын кыздарыбыз, ортончу эжем өгөй атамдын кызы, инимди болсо багып алганбыз. Ортончу эжем бизди башынан эле жек көрүп, ар кандай шылтоо менен ур-токмокко алчу. Өгөй атам менен апам ага болушуп, бизди андан бетер урушчу. Улуу эжем турмушка чыгып, учурда күйөөсү менен жашайт. Мен жалгыз калып, ата-энем жана ортончу эжем тарабынан зомбулук көрүп келем”,- деди жабырлануучу.

“Бир ай мурун үйдө ур-токмок жеп, чыдабай кетип Бишкекке биринчи жолу качкам. Апам аркамдан келип, милициялардын көзүнчө мени кучактап “кызым” деп кабыл алган. Бирок эч ким жокто сабап, чачымдан сүйрөгөн. Үйгө барганыбызда өгөй атам “болду, сени урганды токтотобуз” деген, бирок жалган айтканы көрүнгөн. Бир аз убакыт өткөн соң зомбулук көрсөтүү кайра башталган. Бир
жолу шылтоо таап, мага катуу ачууланып, өгөй атам менен апам дөңгөлөктүн резинасынын камчыга окшош бөлүгү менен сабашкан. Денем ооруп, чоң-чоң көк алалар пайда болгон. 28-январда ата-энем менен базарга чыкканыбызда учурдан пайдаланып, таксиге отуруп Бишкекке качып кеттим”,- деп айтып берди Назбийке.

Назбийкенин толук маегин жакын арада "Супер ТВдан" көрө аласыздар.