Президент: "Темир Жумакадыров асмандагы жылдыз эле, эми аны кара булут жаап калды"

Бүгүн, 9-октябрда вице-премьер-министр Темир Жумакадыровду акыркы сапарга узатуу зыйнаты болду. Анын жүрүшүндө өлкө башчы Алмазбек Атамбаев "Темир Жумакадыров келечекте өлкөнү башкара тургандардын бири эле", - деди.

"Темирди көргөндө эле анын башкача бала экенин билдим. Темирдин акылы, көрөгөчтүгү, тазалыгы мен мына 61ден аштым мындай жигиттер Кыргызда, дүйнөдө аз. Коррупцияда күрөшүүдө, систем түзүүдө, аскердик кызматты, күч түзүмдөрдү реформалоодо, мамлекеттин коопсуздугун чыңдоодо мага оң кол болуп берди. Келип мага сүйүнүчүн да айтчу. Кыргызда таза коом, таза шайлоо болсун деп бүт өмүрүн эл үчүн берди. Урматтуу мекендештер, бүгүн биз үмүт артып жүргөн адамдан айрылып жатабыз. Ал келечектеги мамлекеттин лидерлеринин бири болмок. Ал өлкө үчүн көп иштерди жасады. Мен аны менен кеңешип турар элем. Вице-премьерликке кетип жатканда ага сен кийин өлкөнү башкара тургандардансың дегем. Темир асманда жанган жылдыздай эле. Аны кара булут жаап калды. Жанып турган жылдыздын изи жүрөгүбүздө сакталат", - деди президент.

Андан соң Темир Жумакадыровдун агасы Турдубек Абдырахманов сөз сүйлөп мамлекеттик кызматта болбосо да инисинин тирүү жүргөнү маанилүү болгонун айтып көзүнө жаш алды.

Өкмөт башчы Сапар Исаков Темир Жумакадыровдун аткарган иштери кийинки муунга үлгү болуп каларын белгиледи. Маркумду акыркы сапарга узатуу зыйнаты жыйынтыкталды. Жумакадыровдун сөөгү "Ала-Арча" көрүстөнүнө коюлат.