Мамлекеттик камсыздандыруу уюму 10 айда 546 миллион сом төлөп берди (видео)

Мамлекеттик камсыздандыруу уюму быйылкы жылдын 10 айында камсыздандыруу учурлары боюнча жалпы 546 миллион сом төлөп берди. Бул тууралуу аталган ишкананын төрагасы Элдияр Калдарбеков "Биринчи радиого" билдирди.

Анын айтымында, 2024-жылы уставдык капиталды көбөйтүү максатында мамлекет тарабынан уюмга 5 миллиард сом бөлүнгөн. Акыркы жылдары уюмдун финансылык абалы жакшырып, камсыздандыруу төлөмдөрүнүн көлөмү да өскөн.

"2024-жылы 240 үйгө 37 миллион сом төлөп бергенбиз. 2025-жылы 31 миллион сом, быйыл турак жайлар боюнча эле 61 миллион сом төлөдүк. Андан тышкары, унаалар жана мамлекеттик мүлк да бизде камсыздандырылган. Алардын баарын эсептегенде, быйыл 10 айда 546 миллион сом төлөп бердик. Эки миңден ашык адам мамлекеттик камсыздандыруу уюмунан жардам алды. Былтыр жалпы 146 миллион сом төлөгөнбүз",- деди Калдарбеков.

Ошондой эле ал камсыздандыруу төлөмдөрүнүн өсүшү камсыздандырылгандардын саны жыл сайын көбөйүп жатканын көрсөтөрүн кошумчалады.