Чүйдүн Беловодск айылында шектүү кылмышкерлер тарабынан өлтүрүлгөн келин жана анын апасынын сөөгү жерге берилди

Чүйдүн Беловодск айылында шектүү кылмышкерлер тарабынан өлтүрүлгөн келин жана анын апасынын сөөгү бүгүн, 2-январда жерге берилди. Маркумдардын кошунасы Иван Ивановдун айтымында, кылмыш 31-декабрдан 1-январга караган түнү болжол менен саат 4 чамасында болгон.

"Үй ээсинин балдары Жаңы жылды майрамдап досторунун үйүнө кетишиптир. Түнкү саат 4тө үйдүн дарбазасы тыкылдаганда келин балдарым келди го деп ачат. Эшиктин алдынан бет капчан кылмышкерлерди көргөн келин үйдү көздөй качканда башка атышыптыр. Андан кийин келиндин апасын да башка атып өлтүрүшкөн экен. 3 белгисиз адам үйгө кирип, ээсин коркутуп, 2 айлык небересинин башына мылтык такап, акча бер же болбосо атам дептир. Ал коркконунан үйдө болгон акчасын бериптир. Анан ал кылмышкерлердин бирөөсүн таанып калган окшойт, айтор аны да атышкан. Ок моюнга тийип аман калыптыр. Эсине келип милиция чакырыптыр. Наристеге тийишкен эмес. Бул окуяны мен кечээ түштө уктум. Кошунам чочко багып сатчу. Миллионер деле эмес болчу. Жетиштүү жашачу", - деди.

Эске салсак, кылмышка шектүүлөр үйдөн 100 миң сом өлчөмүндөгү акча алып, андан сырткары 93 миң сомдук алтын зер буюмдарды уурдап кетишкен. Шектүү деп кармалган жарандардын аты-жөнү такталып, алар Чүй облусунун Аламүдүн районунун тургундары 19 жаштагы Т.Н., 23 жаштагы К.В. жана 20 жаштагы Д.К. экени белгилүү болгон.