Саламаттыкты сактоо министри: "Чүйдө төрөттөн каза болгон аялдын өлүмү боюнча иликтөөнү өзүм көзөмөлгө алам"
Саламаттыкты сактоо министри Талантбек Батыралиев Чүй облустук төрөт үйүндө көз жарган аялдын өлүмү боюнча иликтөөнү өз көзөмөлүнө ала турганын айтты. Бул тууралуу ал бүгүн, 21-январда SUPER.KG порталына билдирди.
Министр билдиргендей, кесарево жолу менен төрөгөн аялдын абалы эмнеден оорлоп кеткени боюнча комиссия иликтөө иштерин жүргүзүп жатат. "Учурда бул маселе боюнча комиссия иликтеп жатат. Аял ооруканага келгенде ден соолугу жакшы эмес болгондуктан кесарево менен төрөтүшкөн. Бирок төрөт маалында наркоз алгандан кийин келин анафилаксия абалына (аллергиянын оор абалы) түшкөн. Каза болгон аялдын жакындары менен сүйлөшсөм дарыгерлер "акча сурашты, бир нерсеге үмүт кылышты" деп күнөөлөшүүдө. Бул нерсенин баары иликтенет. Укук коргоо органынын кызматкерлери да текшериш керек. Карга карганын көзүн чукубайт деген принциптер болбойт. Өзүм көзөмөлдөйм", - деди министр.
Эске салсак, 20-январда Чүй облустук төрөт үйүндө 5 күндөн бери комада жаткан аял эсине келбей көз жумган. Саламаттыкты сактоо министрлигинин маалыматына ылайык, ал 15-январда операция жолу менен көз жарган. "Токмок шаарынын 42 жаштагы тургуну 32 жумалык кош бойлуу кезинде бойдон түшүп калуу коркунучу менен Чүй облустук бириктирилген ооруканасына келген. 15-январда анын жүлүнүнө наркоз берилип, операция жолу менен дарыгерлер төрөтүшкөн. 2 килограмм 800 грамм салмакта төрөлгөн ымыркайдын абалы учурда жакшы. Бирок анын апасынын абалы төрөт маалында начарлап кетип, эсин жоготуп, ошол бойдон көз жумган", - деп жазылат маалыматта.
Чүйдө аял төрөттөн кийин каза болду



Жооп алып бериниздерчи супер суранам