Кыргыз улуттук университетинин 9-жатаканасынын жашоочулары митингге чыгышты. Ректор аларды "сүйлөшпөй коём" деп коркутуп жатат

26-мартта Кыргыз улуттук университетинин 9-жатаканасынын жашоочулары митингге чыгышты.

"Бизди жатаканадан чыгуубузду талап кылып жатышат. Алдын ала эскертүү берилген эмес. Аталган окуу жайдын ректору Канат Садыковго кайрылсак, "чыгасыңар" деп коркутууда. Ошондуктан митингге чыкканга аргасыз болдук", - дейт атын атоодон баш тарткан жатакананын жашоочусу.

Митингде тартылган видеодо Канат Садыковдун "сүйлөшпөй коём" деп айтканын кездештирсе болот.

Эске салсак, 23-мартта "Элдик кабарга" "Жатакананын жашоочуларынан бөлмөлөрдү бошотуусун талап кылган жетекчилик электр жарыгын өчүрдү" деген маалымат келген.

Ал эми окуу жайдын башкы инженери Адылбек Маматов SUPER.KG порталына оңдоп-түзөө иштери жүрүп жатканда жатакананын жашоочуларын башка жакка жашап туруусу эскертилгенин айткан. Ошондой эле ал бүгүнкү күндө жатаканадагы жашоочулардын көпчүлүк бөлүгүн мугалимдер түзөрүн билдирген.