"Өнүгүү-Прогресс" премьер-министр жыйынга келбегени үчүн өкмөттүн отчётун караган жок

Бүгүн, 13-апрелде Жогорку Кеңештин "Өнүгүү-Прогресс" фракциясы өкмөттүн 2017-жылы аткарган иштери тууралуу отчётун карамак. Жыйынга премьер-министр Сапар Исаков келген эмес, депутаттар өкмөт башчы өзү келбегенине нааразы болушту. Депутат Исхак Масалиев Сапар Исаков жыйынга келгенде отчётту кароону сунуштады.

"Биздин жыйынга Сапар Исаков өзү катышып, маалымат бергенде туура болот эле. Жылына бир жолу отчёт берет. Ошондуктан жыйынды кийинкиге калтыралы, Исаковдун убактысы болгондо чогулуп угалы", - дейт Масалиев.

Депутат Зиядин Жамалдинов премьер-министр КСДП фракциясынын жыйынына келип, эми экинчи фракцияга келбей койгону туура эмес экенин айтты.

Вице-премьер-министр Дайыр Кенекеев отчётту карап берүүнү суранды. "Өкмөт башчы мурдагы бекитилген күн тартибинин негизинде социалдык объекттердин курулушу боюнча Чүй облусун кыдырып жүрөт. Ошондуктан отчётту карап берүүңүздөрдү суранабыз", - деди Дайыр Кенекеев.

Жыйынтыгында фракция депутаттары Исхак Масалиевдин сунушун колдоп, өкмөттун отчётун караган жок.