Бишкекте мас абалындагы апасын тургуза албай убара болуп жаткан кыздын жана апасынын жашаган жери такталды

Бишкекте мас абалындагы апасын тургуза албай убара болуп жаткан кыздын жана апасынын жашаган жери такталды. Бул тууралуу SUPER.KG'ге Бишкек ШИИББинин маалымат кызматы кабарлады.

"Биринчи Май райондук ички иштер бөлүмүнүн жаш өспүрүмдөр менен иштөө инспекциясы бул үй-бүлө боюнча маалыматтарды тактады. Алардын "Манас" аэропорту жактагы Учкун айылында жашап келгени белгилүү болду. Топтолгон маалыматтар Чүй ОИИББинин жаш өсүпүрүмдөр менен иштөө инспекциясына өткөрүлүп берилди. Эми алардын тагдыры ошол жактан чечилет", - деп билдиришти шаардык милициядан.

Ал эми бул окуя боюнча Эмгек жана социалдык өнүктүрүү министрлиги бул үй-бүлөө тууралуу маалыматтар топтолуп жатканын билдирди.

Эске салсак, Бишкекте болжолу менен 5-6 жаштардагы кыз мас абалындагы апасын тургуза албай убара болуп жаткан видео тараган. Бул окуя борбордогу Логвиненко жана Лев Толстой көчөлөрүнүн кесилишинде 30-октябрда саат 16.00дөр чамасында болгонун шаардык милициядан тастыктап, учурда териштирүү иштери башталганын айткан.