Депутат Төрөбаев: "Өкмөт Ак Үйгө түкүргөн баладан эки жумадан бери айып пулун ала албай уят болдуңар"

Бүгүн, 16-январда Жогорку Кеңештин жалпы жыйыны өтүп жатат. Анда депутат Бакыт Төрөбаев жаңы мыйзамдардын аткарылышы жана чет элдик жарандар тууралуу маселени көтөрдү.

Депутат Кыргыздын жарандыгын алган чет өлкөлүктөр тууралуу так статистикалык маалымат жок экенин айтып, өкмөттү сынга алды.

"Чет жактан келген жарандар тууралуу социалдык тармактарда ар кандай пикирлер айтылып жатат. 60 миң кыргыз кызы чет өлкөнүн жарандарына турмушка чыгып жатканы айтылууда. Ал эми өкмөт 6-7 гана кытай жараны Кыргыз жарандыгын алган деген маалымат берди. Жарандар ал маалыматты кайдан алып жатат? Албетте, социалдык тармактарда бул боюнча талкуулар болууда. Бул иштерде өкмөт социалдык тармактан артта калып жатат", - деди эл өкүлү.

Төрөбаев жаңы ишке кирген мыйзамдардын аткарылышын парламент көзөмөлгө ар дайым алуу керектигин кошумчалады.

"Түкүргөн адам 5500 сом төлөйт дедиңер. Төлөтө алган жоксуңар. Мына Ак Үйгө түкүргөн баладан эки аптадан бери айып пулун ала албай жатасыңар. Өкмөт уят болуп жатасыңар", - деди депутат.