Депутат: "Дарыгерлердин шалаакылыгы менен ВИЧ, СПИД оорулары жугуп калган балдарга эч ким көңүл бурбай келет"

Бүгүн, 7-мартта Жогорку Кеңештин жалпы жыйынында ар кандай маселелер каралып жатат. Анда депутат Айнуру Алтыбаева жаш балдардын ВИЧ, СПИД ооруларын жуктуруп алышканын айтып чыкты.

Алтыбаева бул оору жаш балдарга 2007-жылы Ош облусунун Ноокат районундагы дарыгерлердин шалаакылыгынан жукканын билдирди.

"Андан бери көп убакыт өттү. Балдардын жана алардын энелеринин тагдырына балта чапкандай болду. Бул үй-бүлөлөрдүн аталары кетип калып, апасы менен калышты. Алар азыр сыздап, ыйлап жатышат. Өкмөт бул маселени комплекстүү карашы керек. Балдарга берилүүчү жөлөк пулдар 18 жашка жеткенде токтотулат. Андан ары да аларга каржылык колдоо керек болот. Энелер мындай көйгөйлөрүн айтуу менен бирге турак жай маселелерин көтөрүштү. Мамлекеттик деңгээлде аларга колдоо көрсөтүлүүсү зарыл. Анткени ал балдардын күнөөсү жок. Бул жакта дарыгерлердин катасы болуп жатат", - деди эл өкүлү.