Чүй облустук соту Садыр Жапаровду шарттуу түрдө мөөнөтүнөн мурда бошотуудан баш тарткан чечимди күчүндө калтырды

Чүй облустук соту Садыр Жапаровду шарттуу түрдө мөөнөтүнөн мурда бошотуудан баш тарткан чечимди күчүндө калтырды.

Бүгүн, 19-августта Чүй облустук сотто Садыр Жапаровдун иши каралды. Буга чейин Аламүдүн райондук соту Садыр Жапаровду шарттуу түрдө мөөнөтүнөн мурда бошотуудан баш тарткан. Соттук отурумда прокуратура өкүлү райондук соттун чечимин күчүндө калтырууну өтүндү. Ал эми жактоочулар Садыр Жапаровго карата мунапыс колдонууну суранышты.

Окуянын чоо-жайы:

Садыр Жапаров 2013-жылдын 7-октябрында Каракол шаарында "Кумтөр" боюнча нааразычылык акциясындагы башаламандыкты уюштурууга күнөөлөнүп, 2017-жылдын 25-мартында Кыргыз-Казак чек арасынан кармалып камакка алынган. 2017-жылдын 2-августунда Жапаров Биринчи Май райондук сотунун өкүмү менен "барымтага алуу" беренеси боюнча күнөөлүү деп табылып, 11 жыл 6 айга эркинен ажыратылган. Райондук соттун өкүмүн Бишкек шаардык соту жана Жогорку Сот күчүндө калтырган. Быйыл 30-апрелде Жогорку Сотто абактагы саясатчы Садыр Жапаровдун иши кайрадан каралып, соттук коллегия анын жаза мөөнөтүн бир жарым жылга кыскарткан.