Башкы прокуратура Курсан Асановдун уулуна издөө салды

Ички иштер министринин мурдагы орун басары Курсан Асановдун уулу Мухаммед-Али Асановго издөө жарыяланды. Бул тууралуу Башкы прокуратурадан билдиришти.

Маалыматка ылайык, Курсан Асановдун уулуна 27-август күнү издөө жарыяланган.

Курсан Асанов 8-августта Алмазбек Атамбаевдин үйүнөн далил буюмдарды алып чыгып, жан сакчысы Дамирбек Пайзылла уулу аркылуу баласы Мухаммедге берген деген айып менен 27-августта үй камагына алынган. Ал эми Асановдун уулуна 27-августта аталган кылмышка катыштыгы бар делинген шек менен сыртынан камакка алуу чечими чыгып, издөө жарыяланды.

27-августта Биринчи Май райондук соту Курсан Асановдун баш коргоо чарасын карап, 13-октябрга чейин үй камагына алуу чечимин чыгарган.

13-августта Курсан Асанов "милициянын кызыкчылыгын сатты" деген жүйө менен министрдин орун басары кызматынан бошотулган. Ички иштер министрлигинин басма сөз кызматы министр Кашкар Жунушалиев Атамбаевди кармоо учурунда аны менен жалпысынан 3 жолу сүйлөшүү жүргүзгөнүн, министр макул кылдырган соң гана ал ишке Асанов аралашканы тууралуу маалымат тараткан.

Башкы прокуратура Курсан Асановдун иши боюнча кызматтык иликтөөнүн материалдары менен таанышып чыгып, ал материалдардын негизинде "кызматтык абалынан кыянаттык менен пайдалануу" беренеси боюнча кылмыш иши ачылган. Сотко чейинки өндүрүштү жүргүзүү Аскер прокуратурасына өткөрүлгөн.