Чек ара кызматы: "Тажик тарап Кыргыз жаранын чек араны бузуп киргени үчүн кармаган"

Тажик тараптын "Чарку" базарына 24-октябрь күнү кирип, бүгүнкү күнгө чейин дайыны чыкпай жаткан Асылбек Каримов тууралуу мамлекеттик Чек ара кызматы SUPER.KG порталына айтып берди. Чек ара кызматынын маалыматында, Кыргыз жараны чек арадан өтүүдө мыйзамга туура келбеген аракеттерди жасаганы үчүн кармалган. Эми кыргыз тарап тажик тарапка алардын мыйзамына ылайык өлчөмдөгү айып пул төлөшү керек.

"24-октябрда Тажикстандын чек арасынан Кыргыз жараны Асылбек Каримов кармалган. Тажик тараптын билдирүүсүнө таяна турган болсок, Каримовду тажик тарап чек арадан мыйзам бузганы үчүн кармаган. Баткен облусунун чек ара кызматы бул боюнча тажик тарап менен жаранды өлкөсүнө кайтаруу боюнча сүйлөшүү жүргүзгөн. Тажикстандын чек ара кызматы Кыргыз жаранын кайтаруу үчүн ал айып пул төлөө керек экенин билдирген. Учурда Кыргыз өлкөсүнүн Чек ара кызматы жана Баткен облусунун мамлекеттик администрациясы Кыргыз жаранын өлкөсүнө кайтаруу үчүн аракеттерди көрүп жатат", - деди Чек ара кызматынын маалымат кызматынан.