Жер тилкебизди мыйзамдаштыра албай жүрөбүз деп митингге чыккандар депутаттардын убадасын угуп тарап кетишти

2012-жылы Сокулук районунун Военно-Антоновка айылынын аймагынан жер тилкесин сатып алып, бирок үй салууга уруксат ала албай жаткан жарандар бүгүн, 31-октябрда Жогорку Кеңештин алдына нааразычылык акциясына чыгышты. Алар өкмөттөн сатып алган жер тилкелерине үй салууга уруксат берүүсүн суранып, акция өткөрүп жатканын билдиришкен.

Акцияга катышкандардын бири Шайырбү Раимова бийлик маселеге чекит коё албай жатканын айтып, нааразы болду.

"2012-жылы 4 миңге чукул адамга 4 сотыхтан жер сатылган. Ал жер тилкелеринин кээ бирлерине үй салынып, шагыл төгүлгөн. Биз депутаттарга кайрылуу жасадык, келип кеткиле деп чакырдык. Эч бир бийлик өкүлү биздин үнүбүздү укпай жатышат. Мисалы, мен жер тилкесин кызыма алгам. Кызым үч баласы менен батирден батирге көчүп ызылдап жүрөт. Менин үйүмдө толтура кайрылуу каттары турат. Алардын бирөөнө дагы алгылыктуу жооп болгон жок. Алардан мыйзамдын чегинде карап жатабыз деген жообунан башка сөз уга элекпиз", - деп билдирди ал.

Нааразы болгон эл эртең мененден тартып кечке чейин Ак Үйдүн алдында бийлик өкүлдөрүнөн жооп күтүп турушту.

Нааразычылык акциясы кечке чейин уланып, болжол менен аянттан саат 16:40 чамасында тарап кетишти. Бул тууралуу акцияга катышкандар билдиришти.

Алар Ак Үйдөн Тазабек Икрамов жана Нурбек Алимбеков кабыл алганын жана бул маселени чечип берише турганын айтып, убада бергенин белгилешти.