Футбол федерациясынын вице-президенти Дастан Конокбаев: "Футбол борбору Сокулук районунда курулат"

Бүгүн, 30-декабрда Кыргыз Республикасынын Футбол федерациясынын жетекчилиги футбол сүйүүчүлөрү жана күйөрмандары менен жолугушуу өткөрүп жатат. Анда Бишкекте Футбол борборун куруу үчүн жер тилкесин бөлүп берүүнүн тегерегинде акыркы күндөрү болуп жаткан сөздөр талкууга алынат.

Футбол федерациясынын вице-президенти Дастан Конокбаевдин айтымында, Футбол федерациясы менчикке жер албайт. "Мэриядан жер берүүнү эле сурандык, жер бөлүп берүү чечимин, жер тилкесин көрсөтмөйүнчө толук долбоорду да көрсөтүү мүмкүн эмес. Эмнеге Бишкекти тандадык? Кыргыз Премьер-Лигасында ойногон клубдардын көбү Бишкекте. Оштогу академия да стадиондун жанына курулган. Кара-Балта шаарын карадык, ал жакта жакында футбол талаасы курулат. "Алга Бишкек" командасынын академиясы, инфраструктурасы жок. Футбол борбору - "Алганын" үйү жана улуттук курама команданын базасы болот.

Менчикке өткөрүү деген маселе бизде жок. Футбол борборун куруп бүткөндөн кийин мэриянын балансына өткөрүлөт. Оштогу футбол борборун да мэрияга өткөрүп бергенбиз, бирок алар бизге башкарууну өткөрүп берген.

Учурда Орок айыл өкмөтүндө айылдык кеңеш болуп жатат. Футбол федерациясынын жетекчилиги учурда сүйлөшүү жүргүзүп жатат. Орок айыл өкмөтүндө Футбол борборун курууга бир канча гектар жер бөлүп берүүсү каралууда.

Бишкек мэриясы боюнча суроо ачык, бирок футбол борбору курулбайт. Бишкекке "Алга" клубу үчүн стадион куруу үчүн сүйлөшүү жүрөт. Футбол борбору Чүй облусунун Сокулук районунда курулат", - деди Конокбаев.