Бишкекти ыш каптап жатат. Жаңы жылды салютсуз тосууга кандай карайсыз? (сурамжылоо)

Жыл тогошуп, жаңы жыл кирип келээрде пиротехникалык каражаттарды колдонгондор Кыргыз өлкөсүндө болбойт деп айтсак туура эмес болот. Анткени көпчүлүктүн аң сезиминде салюттар майрамдык маанайга шаң кошот деген түшүнүк калыптанган. Буга чейин 2016-жылы аталган каражаттарды өлкө аймагында сатууга жана колдонууга тыюу салынган.

Бул чечимди экологиялык жана техникалык коопсуздук инспекциясы кабыл алып, андан жабыркагандардын коопсуздугун алдын алуу менен тыгыз байланышта экенин түшүндүрүп, салют колдонгондорго 50 миң сом айып пул салган. Айрым маалыматтар боюнча пиротехникалык каражаттарды өндүргөн Кытай мамлекетинде дагы бул нерсени колдонууга чектөөлөр киргизилип, тыюу салынган. Анын максаты абаны жана экологияны коргоо болуп саналат.

Биздин сурамжылоого катышкан жарандардын дээрлик бардыгы пиротехникалык каражаттарды колдонбой тургандыгын айтышты. Аны алар абанын тазарышына кошкон салым катары түшүндүрүп беришти. Ал эми Бишкек мериясы 2020-жылкы Жаңы жыл майрамына карата 6 мүнөткө созулган салют аттырууга тиешелүү суммадагы каражат бөлгөн. Социалдык тармактын активдүү колдонуучулары демилгелеген акцияга карата калаа башчысынын кеңешчиси Гуля Алмамбетова мындай жооп узатты.

"Салют боюнча тендер өтүп, жыйынтыгы жарыяланып калган. Мындан улам биз бюджеттик кодексти сакташыбыз керек. Эгерде тендерден баш тартабыз десек, анда биздин бул ишке тиешелүү кызматкерлер жоопкерчиликке тартылып калышы мүмкүн.

Биз тартип боюнча өткөрүп жатабыз. Эгер ушундай эле чоң талкулоо жүрүп жатса, ар бир жаран өздөрүнүн депутаттарына айтып, ал шаардык кеңештин депутаты бизге токтом чыгарып берсе, ага биз баш ийебиз", - деди ал.