"Данияр Үсөнов Беларуска 700 миллион доллар инвестиция кылды. Кыргыз бийлиги анын акчаны кайдан алганына кызыгып койгон жок" дейт Бекназаров

Бүгүн, 16-январда саясатчы Азимбек Бекназаров бийликке нааразычылыгы бар экенин айтты. Бул боюнча ал маалымат жыйын учурунда билдирип, нааразычылыгы өлкөдөн качып кеткен мурдагы өкмөт башчы Данияр Үсөнов менен байланыштуу экенин белгиледи.

Ал президентке, өкмөт башчыга жана Жогорку Кеңештин депутаттарына кайрылды.

"Данияр Үсөнов Беларуста Даниил Урицкий деп аты-жөнүн өзгөртүп алган. Өмүр бою камакка алынган адам Данияр Үсөнов 700 миллион доллар инвестиция киргизип, ири объект куруп жатат. Анын бир шериги Бакиевдин небереси.

Өмүр бою камакка алынган бул адам акчаны кайдан алды деп бийлик эмнеге суроо жөнөтпөйт? Башкы прокурор акчаны кайдан алып жатат деп эмнеге изилдебейт, журналисттер жазып жатат, эмне үчүн бийлик реакция кылбайт? Кайда биздин Улуттук коопсуздук мамлекеттик комитет, эмне кылып жүрөт? Мейли Курманбек Бакиевди алып келе албасын, Жаныш Бакиев менен Данияр Үсөновду алып келбейби? Эмнеге ушунун баарын иликтебейт? Ал эми Акаевдин беш иши бар да, эмнеге сурак жүргүзүшпөйт? Чет өлкөдө мааракелерин өткөрүп, өлкөнү шылдыңдап жүрүшөт", - деди Бекназаров.

2018-жылы Беларустун жалпыга маалымдоо каражаттары Кыргыз өлкөсүнүн мурдагы премьер-министри, издөөдө жүргөн Данияр Үсөнов тууралуу маалымат жана анын сүрөтүн жарыялаган. Анын учурда "Беларусь улуттук биотехнология корпорациясы" ЖАКсын жетектей тургандыгы, Данияр Үсөнов өзүн Даниил Урицкий деп тааныштыргандыгы айтылган.