"Ош базары" бүгүн тынч. "Кыял" өндүрүштүк соода борборунун сатуучулары учурда иштеп жатышат

"Ош базарындагы" “Кыял” өндүрүштүк соода борборунун сатуучулары кадимкидей соода орундуктарында иштеп жатышат. Бул тууралуу бүгүн, 4-февралда сатуучулар билдиришти. Айтымдарында, учурда соодаларын кылып жатышат жана базар тынч.

Кечээ, 3-февралда “Кыял” өндүрүштүк соода борборунун сатуучулары нааразычылык акциясына чыгышкан. Алар жаңы келген администрация сатуучуларды иш орундарынан кууп жатканын айтып, арызданышкан болчу. “Жаңы келген администрация эмне үчүн мындай кылып жатат бизге түшүнүксүз. Алар мыйзамсыз тургансыңар деп кетишибизди талап кылышууда”, - деп билдиришкен окуя тууралуу SUPER.KG порталына.

Сатуучулардын нааразы пикиринен улам “Кыял” өндүрүштүк соода борборунун администрациясын көздөй багыт алып, атайын репортаж даярдаганбыз. “Соодагерлер жетекчилик бизди кабыл албай жатат, чалсак жооп жок”, - дешип тиешелүү тараптардын жооп берүүсүн талап кылышкан. Эл ызы-чуу түшкөндөн кийин администрация жабылган орундуктардын ачыла турганын кабарлап, сатуучулардын жабылган иш орундуктарын ачып беришкен. Толкуган эл “Кыял” өндүрүштүк соода борборунун директору Данияр Тербишалиевдин чыгып түшүндүрмө берүүсүн талап кылып, бирок андан жооп болгон эмес.