Мугалимди класстан жулкулдатып чыгарган окуя: Окуучу эки айдан бери мектепке бара элек

Умай Турсунбекова менен Периште Турсунбекова №95 мектептин окуучулары. Бирок кыздар учурда мектепке барууну токтотуп, музыкалык ийримдерине гана барып жатышат.

Өткөн жылдын 17-декабрь күнү №95 мектептин башталгыч классынын мугалими Гүлфиза Мамытбекова менен окуучунун апасы Шахзада Авсаматованын ортосунда чыр чыкканы коомчулукка белгилүү. Кийинчерээк аталган окуяны чагылдырган видео социалдык тармактарга тараган.

Окуя боюнча 14-февраль күнү Ленин райондук соту “майда бейбаштык” беренесинин негизинде окуучунун энесин күнөөлүү деп таап, ага 30 миң сом айып салган. Айтылгандардан улам окуяга байланыштуу коомчулуктун эки жээкке бөлүнгөн сын-пикири азыркы учурга чейин токтой элек. Учурда таланттуу кыздардын мектепке барбай калганына эненин айтуусунда 2 айга чукулдап калды. Алардын сабакка барбай жатканын кыздардын энеси "балдардын жеке чечими болду" деп түшүндүрөт. Айтымында, кыздар мектептен басмырлоого кабылган.

Айтылгандарга байланыштуу №95 мектептин директору Айгүл Шимова төмөнкүлөрдү айтып берди. Айтымында, аны кыздардын мектепке келбегени катуу кабатыр кылууда. “Окуучулар эч кандай кысымга кабылган эмес. Алардын энесине мугалимдер чалып, мектепке жиберүүсүн өтүнгөн аракеттер көрүлүп жатат. Бирок ага карабай окуучулар сабакка келише элек", - деп билдирди ал.

Ал эми психолог Данияр Чормошев окуядан коомчулук сабак алышы керек дейт. Айтымында, эгер окуядан тыянак болбосо, мындай жагдайлар кайра-кайра кайталана берет жана бул абалда балдарды колдонуп, аралыштыра берүүнүн өзү туура эмес.

Белгилей кетсек, окуучу кыздардын апасы Шахзада Авсаматова коомчулукка акын жана журналист катары таанымал. Анын ырларын Гүлзада Рыскулова, Назми Байзакова, Батма Султанова жана башка көрүнүктүү ырчылар аткарып жүрүшөт.