Лионель Месси "Барселонадан" кетсе кайсы клубга өтөт? Футболчуну катарына кошуп алууну көздөгөн клубдардын тизмеси

Футбол жылдызы Лионель Месси "Барселона" клубунан кетүү чечимин кабыл алгандыгы тууралуу дүйнөлүк басылмалар жазышууда. Футболчу каталондук клубдан кетсе, алдыдагы карьерасын кайсы клубда улантышы мүмкүн?

Франциянын "ПСЖ" жана Англиянын "Манчестер Юнайтед" клубу Мессини сатып алууга негизги талапкерлер. Бул клубдар футболчуну катарына кошуу үчүн болгон күчүн жумшаганга даяр экендигин дүйнөлүк басылмалар жазышууда.

Италиянын "Интер" командасы дагы футболчуну сатып алууга кызыкдар клубдардын бири. "Интер" клубунун кытайлык кожоюндары албетте, футболчу макул болсо, аны сатып алууга даяр.

Ошол эле учурда чет элдик басылмалар өздүк булактарына таянуу менен Лионель Месси Англиянын "Манчестер Сити" клубунун башкы машыктыруучусу Хосеп Гвардиола менен телефон аркылуу сүйлөшкөндүгүн жазышууда.

Ошентип Лионель Мессини сатып алууга даяр 4 клуб белгилүү болду. Алар: "ПСЖ", "Интер", "Манчестер Юнайтед" жана "Манчестер Сити".

Буга чейин Лионель Месси "Барселона" клубунан кетүү чечимин кабыл алгандыгы кабарланган.