Казакстанда Кавасаки синдромуна окшош оорудан эки ымыркай чарчап калды

Казакстанда Кавасаки синдромуна окшош оорудан эки жана үч жаштагы эки бала чарчап калды. Бул тууралуу Казакстандын "Педиатрия жана балдар хирургиясы илимий борборунун" башчысына таянуу менен жергиликтүү басылмалар жазып чыгышты.

"Педиатрия жана балдар хирургиясы илимий борборунун" башчысы Риза Боранбаеванын айтымында, ата-энелери балдарды ооруканага кечирээк алып келгендиктен, алардын өмүрүн сактап калууга мүмкүн болгон эмес. Мындан тышкары балдар кошумча кызыл жүгүрүк (красная волчанка) илдети менен да жабыркашкан.

Дарыгерлер «Кавасаки синдромуна» окшогон оору жаңы типтеги коронавирустан айыккан балдарда пайда болуп жатканын билдиришүүдө. Чарчап калган эки бала да бир нече жума мурда COVID-19 менен ооруган.

Боранбаеванын айтымында, Казакстанда «Кавасаки синдромуна» окшогон мультисистемалык ооруга чалдыккандардын саны 41 балага жетти. Алардын баарында тең коронавируска каршы антитела пайда болуп, 37си айыгып чыкты" , - деп жазылат маалыматта.

Маалым болгондой, Казакстанда балдар Кавасакиге окшогон мультисистемалык ооруга кабылган алгачкы учур 4-августта катталган.