Көзүн ирмегенден башка кыймыл жок. 17 жаштагы Аида кабылган жол кырсыгы боюнча соттун чечими чыкты

Буга чейин Жалал-Абад облусуна караштуу Токтогул районунун тургуну 17 жаштагы Аида Ниязбек кызы өткөн жылы август айында автокырсыкка учурап, алты айдан бери бери эс-учун билбеген абалда жаткандыгы тууралуу видео материал даярдаганбыз.

Анда Аиданын апасы Бактыгүл Кулдубаева кызы тууралуу айтып берген. Ошондой эле ал айдоочуга сот адилет чечим чыгарбай, улам ар шылтоону айтып убактысын жылдырып жаткандыгын кошумчалаган болчу.

Аталган иш боюнча кезектеги соттук отурум 3-февралда кайрадан каралып, айдоочу 2 жылга эркинен ажыратылгандыгын SUPER.KG порталына Бактыгүл Кулдубаева билдирди.

"Сот болот деп атайын Токтогулга барып келдим. Айдоочуну 2 жылга эркинен ажыратып, 500 миң сом дары-дармегине төлөп берүү боюнча чечим чыкты. Бирок мен буга макул эмесмин. Абакта 1 күнү 2 күнгө эсептелет экен. Мен облустук сотко арызданам, ал дагы болбосо Жогорку Сотко чейин кайрылам. Менин кызым азыр эс-учун билбеген абалда жатат. Күлгүндөй курагында минтип төшөккө байланып калды. Айдоочунун апасы кызымды бир ооз сураганга жараган жок, кайра менин дарегиме ар кандай сөздөрдү айтты", - дейт Кулдубаева.

6 айдан бери төшөктө жатып, көзүн ирмегенден башка кыймыл жасай албай калган Аиданын абалын шилтеме аркылуу кирип көрүңүз.