"Бейкүнөө жерден 5 жыл түрмөдө отурдум" деген жарандын окуясы

SUPER.KG порталына Исфандиор Мирзахакимов аттуу жаран кайрылган. Ал күнөөсүз болгондугуна карабай тоноого айыпталып, 9 жылга эркинен ажыратылган. Бирок апасы акыйкаттуулук үчүн 5 жылга чукул чуркаган соң Исфандиордун күнөөсүз экендиги далилденген. Уулу 4 жыл 9 ай түрмөдө ак жеринен отурганы үчүн соттор, тергөөчүлөр бул үчүн жооп берип, компенсация төлөшү зарыл дейт Мирзахакимовдун апасы. Бирок алардын арызын азырынча эч ким канааттандыра элек.

Алгач тергөөчүлөр Исфандиор Мирзахакимовду тоноого айыптап, Таласка алып кетишкен. Сотто тонолгон делген жабырлануучу кыз Исфандиорду көрсөтүп туруп алган. Адвокатынын айтымында, жабырлануучу сүрөттөп берген адам Мырзахакимовго такыр окшошпойт. Бирок сот 9 жылга эркинен ажыратуу чечимин чыгарган. Андан соң Чүйдөгү Молдовановка айылындагы №27 түзөтүү колониясына которушкан.
Соттолуучунун апасы Гульзара Мирзахакимованын кайрылбаган жери калган эмес. Акыры өлкө президентине эки жолу кат жазган. Андан соң иш боюнча дыкат териштирүүлөр башталганын билдирет. Акыры чыныгы күнөөлүү адам табылып, кармалган соң Исфандиор эркиндикке чыккан.
Мирзахакимовдун үй-бүлөсү келтирилген моралдык, материалдык зыяндын ордун толтуруу үчүн доо арыз менен Биринчи Май райондук сотуна, шаардык сотко кайрылышкан, бирок алар доо арызды кароодон баш тартышкан.