Лимонтинин өлүмү: Айыпталуучу Талгат Шамиев: "Сени дагы атаңдай кылып өлтүрөм дегенден кийин калганы эсимде жок"

Бишкек шаарынын Биринчи Май райондук сотунда Лимонти каймана аты менен белгилүү болгон кримтөбөл Алмазбек Сулаймановдун өлүмү боюнча соттук отурум өтүүдө.

Соттук отурумда шектүү Талгат Шамиев күнөөнү жарым-жартылай моюнуна алганын айтты.

"Мен мыйзам алдында жооп берүүдөн качкан жокмун. Милицияга ошол эле күнү өзүм келгем. Бүгүн дагы жооп бергенге даярмын. Бирок мага туура айып коюлушун талап кылам.

Мен бул ишти атайылап кылган жокмун. Экөөбүз жолугуп калганда мени сөгүп, "сени дагы атаңдай кылып өлтүрүп салам" дегенден кийин калганы эсимде жок", - деди ал.

Эске салсак, 2020-жылдын 28-март күнү Нарында кримтөбөл Алмаз Сулаймановду өлтүрүп кетишкен. Анын өлүмүнө шектүү катары 25 жаштагы Талгат Шамиев аттуу жаран кармалган. Ал Нарын ОИИБинин имаратына киши өлтүрүп алдым деп өзү келген.

SUPER.KG порталына өздүк булактар айыпталуучу атасынын өчүн алганын билдиришкен. Талгат Шамиевдин атасы Имаш Шамиев 1997-жылы Алмаз Сулайманов тарабынан өлтүрүлгөнү маалымдалган.